Act 27 | TVK | STEP | Di, Vat Festas miling melengien tengan Pol del rute sav xil mun xa ladi nim te xeih lave taon tahal Rom e provins tahal Itali, e inou Luk be xamem. Ma miling xamem e he vat tei na vanut moletin te vaeen xil xa hisen Sulias. Moletin nan xil labe handred tei (100) e lakes xil ni 'Vanut Moletin te Vaeen na Suv Toto tahal Rom'.

Acts 27

Pol Nggo Tuturil Tei Be Rom

1 Di, Vat Festas miling melengien tengan Pol del rute sav xil mun xa ladi nim te xeih lave taon tahal Rom e provins tahal Itali, e inou Luk be xamem. Ma miling xamem e he vat tei na vanut moletin te vaeen xil xa hisen Sulias. Moletin nan xil labe handred tei (100) e lakes xil ni 'Vanut Moletin te Vaeen na Suv Toto tahal Rom'. 2 Manggo tuturil tei e hal Atramitiam xa di labue xati tengan vahe pasis xil e provins tahal Esia. Di, matoba del xat moletin tei tahal Masedonia xa tete hal Tesolonaeka, hisen Aristakas. 3 E melengien sav, matduxoh pasis tahal Saedon. E Sulias en misae e Pol, ma mae ni tengan ha vapus ti timue nan xil tengan lisa ti neta mini xa xi ien bei. 4 Melele xa mabe reling Saedon, votiang miseten nggeih, misak ni maba makapis manggo rin sav e aelan tahal Saepras xa tas merou vuteili en. 5 Di, manggur xoteh tas sangas ni provins tahal Silisia del Pampilia, e ba masotie e taon tahal Mira xa de provins tahal Lisia. 6 E rute ak, mabut mabe ut e Sulias mikamet tuturil tei mun na mol-Aleksandria xil xa di bue xat xi tengan vahe Itali, ma misis vatihos tengan vamae ni xamem mava en.

7 Di, tuturil xa matnggo en, dat miloh merou tang melengien vahis vengan xa votiang nggeih pupu. Melengien hao mei mitavi, di, maduxoh rute tei sangas visal taon tahal Nitas. E tuturil misakras valoh vamal vengan votiang nggeih tamu, misak ni biles ba nggusil aelan tahal Krit, e rin xa tas be tan vuteili en. Di, tuturil miloh ba nggo sangas ni meteh xil sangas visal taon tahal Salmone. 8 Di, manggo sangas ni ut te aelan tahal Krit, e tas nggeih tova tang. Ma maloh maba vuma ... maduxoh rute tei xa bos xa lakesi ni 'Pasis xa Bos'. Pasis ak tave sotin ti ra taon tahal Lasia.

9 E rute ak, mapusi xa matehas melengien hao ngamu e suse e misak ni madi ngamu e melengien xil te an tesa (melengien xa Siu xil di labal ni anien ve 'Melengien te Kas Moten Meulien En ni Ra' mitavi ngamu ^{▼▼27:9 Melengien Eo ak be na Siu xil xa di lapol ni e hoxalite te aveti Septemba. E melengien kokot xil te Septemba ba duxoh hoxalite te aveti Febuari be melengien xil te an tesa xa tavos ti tengan tuturil xil laloh en.}). Melele xa vat te moletin te vaeen di minem usili, Pol misa nenemien nan mini bit, 10 “Tiramue xil, e ketehen navan, napusi xa suse nar ixeih pupu. Tuturil ak imahoe lel, holesok xil xa di vangite ikesae, e moletin ngan xil mun lilel.” 11 E Sulias xa be vat na moletin te vaeen xil, xi miteong kes ni sepinien na vatihos del moletin xa tuturil nan, xi minem mele ni sepinien na Pol. 12 Xalu lubiteni mini lubit pasis xa madi en tavos ti e melengien xil te an tesa. Sangas moletin xil vus iexil bei xa lasak pisi lakapis e aelan ak e va lave pasis xa bos xa de hal Finiks e aelan ak tahal Krit tengan lavur sen melengien xil te an tesa en. Pasis ak nggur mesal e rin lu, tei nggo saotwes, e tei mun nggo notwes.

Votiang Tei xa Nggeih Bas Pol Xatel

13 Melele xa votiang hos tei xa nggo saot mistal mi xamem, moletin xil te tuturil lanemi labit bos tengan mava vaxoni lingxatien nae. Misak ni lalih rat angga e manggo sangas tang ut maba. 14 Tavehi ti, votiang tei xa nggeih pupu, xa lakesi ni 'Toio', ^{▼▼27:14 Toio be votiang xa nggo notis e nggeih pupu.} nggo ut bemei, mei divin tuturil be mesal. 15 Vengan xa votiang bas pupu ni tuturil e masakras maviles matilomun mavusil suse namem mava, ma mamae ni tang votiang divin xamem maba. 16 Manggus vuteili melele xa be manggo rin xa be saot e tutut aelan tahal Kaoda. E rute ak, del xeihen, maling kuh bot te tuturil ak. 17 Di, boskru xil te tuturil lapo rati bemei nesao. Di, laso ao xil be tas mei langgo pe tuturil, di malet xat xil tengan tas naxu len ni ti. Xil ulixil mikan xa tuturil naxon e mae e kantri tahal Libia, misak ni laseti sel be tan. 18 Vatiang ak nggeih dat mak tang duxoh melengien sav xil mun e tas di bas tuturil xa madi en misa tang, ma laso rut holesok xil xa di vangit tuturil be tas. 19 Melengien sav mun, laso rut holesok xil te tuturil xa meas be tas. 20 Melengien hao matapus ti eai mu hitu xil tengan mapus kil suse namem vaxo en. Vatiang miseten dat mak e xamem vus manemi mabit be te maten tuei iaxa madi xiak.

21 Di, melele xa Pol pusi xa moletin xil lataxanien ti melengien holu, mitamea misoh pe met xil e biteni mi xil bitene, “Tiramue xil, xosxa vahit muteong ni nou e munave reling Krit ti, ma musakras mukameti vaxeih vamak e holesok xil mun misakras vakesae vahe tas vamak. 22 Tave ti neta xa mak, ulimim nakan ti mun. Moletin ti nakesae. Tuturil kestang iaxa ikesae. 23 E vongien, masxaxa tei na Hi xa nabe moletin nan e xa di namot mini mei testal minou e tehiteni minou tehitene, 24 'Pol, ulum nakan ti. Hi miling xati tuei tengan xouk ha usoh pe met Suv Toto tahal Rom. E xi mae ni xa moletin xil vus mun xa ladi e tuturil ak del xouk, linalel ti.' 25 !Ma tiramue xil, ulimim nakan ti! Nanesi e Hi xa holesok xil istal ixoni ngan taxa masxaxa ak tehiteni minou. 26 E tuturil ak iha ixon ite aelan tova.”

27 Melele xa mateloh e votiang ak wik lu e tas tahal Mediterenia, e hilaep te vongien, rut moletin xil xa di lapol e tuturil di lanemi labit sangas mave ut. 28 Misak ni laso ao be tas tengan lakameti xa tas ak be huinep midep, e lakameti xa be huinep duxoh mita xa be hanutap tei e lu e le sav mun (37 m). Ma laloh vuteili mun e laso rilomun ni e lakameti xa be huinep duxoh mita xa be hanutap tei e lu e he sav mun (27 m). 29 Ulixil mikan xa tuturil ak naxon nate hat ti, misak ni laso tiei ni angga hat (4) xa di pe vil tuturil e moletin xil ngasen di lasis mi hi nae xil tengan ut valan katen. 30 Di, moletin xil xa lapol e tuturil lanemi labit lilesae relingi, misak ni lasae ni bot be tas. Xil di laluvos labit liha tengan liling xat angga xil iti vat tuturil mun. 31 E melele xa Pol pusi mak, ba biteni mi vat na moletin te vaeen xil del moletin nan xil bit, “Xosxa moletin xil te tuturil ak lilesae rani, ma xamim vus musakras mumeul.” 32 Ma moletin xil te vaeen lada xoteh ao xa dal xat bot e lalingi misal ba.

33 Sangas ut valan, Pol nggeih xat xil tengan lavanien ti, ma biteni mi xil bit, “Wik lu tuei xiak di munexo pupu, ma mutaxa ti neta. 34 Mak, ma bos xa muanien ti mu li tengan vemim ixeih e mukila mumeul. Munanexo ti vengan xa nakila xa neta ti naxui xamim.” 35 Melele xa Pol misepin bus, xi mileh beret vutei e memes Hi ven pe met xil. Di, bul pasi e ngga ni. 36 Melele xa lapusi mak, ulikanen be reling xil, e xil mun langga anien vutei. 37 Xil vus xa ladi e tuturil ak laduxoh handred lu e hanutap tol e tei e le sav mun (276). 38 Melele xa xil vus langganien bus, laso bak pulaoa xil vus xa teti vangite be tas tengan vasak ni tuturil vameit.

Tuturil xa Pol Xatel Latdi en Minggon De Mae

39 Melele xa ut da miluv kuhi, moletin xil te tuturil lale ras rute xa ladi en. E lale kil tutut pasis tei xa be suhon, ma lanemi labit xosxa itep, ma lipol ni tuturil ha isal xat suhon tang. 40 Mak, ma lada xoteh angga xil lamerir labe tan, e lada xoteh ao xil xa dal xat stia. Di, lalihi rut sel xil xa di vat tuturil be nesao tengan votiang ikila itivin tuturil ak ihe ut. Di, maloh ve ut. 41 E tuturil ba minggon e mae tang, ma misakras mun valisalis ti. Vatin iaxa nggon, ma tahe xil xa nggeih mei di nggol len ni nggo toun.

42 Moletin xil te vaeen lapol ni lingxatien tei labit lihas vin vatxeih xil ngasen xa ladi pe he tengan linaxul ti linave ut, maxa ni ha linalesae. 43 E vat nae tamaen ni ti vengan bit vateh meulien e Pol. Ma misemae ni moletin xil vus xa lakil xulen tengan lavut lave tas e laxul lave ut. 44 E moletin xil xa latakil ti xulen, bit liha sung itutou itel xat mavulut pilang xil te tuturil e lisal itela lihe ut. Ma nggo sexien ak vari, xamem vus ba maduxoh ut mameul.